البنطلون الساقط

البنطلون الساقط

ما هو هذا الشئ الغريب؟!!
لاغريب ولا حاجه .. هو بنطلون وبيكون واقع شويه وتحته تظهر ألوان
Light
زى الأحمر والأصفر والفوشيــك
وألوان شفتشى كده ماللى بتزغلل العين ...
والناس اللى بتظلم الولاد وبتقول عليهم عيال سيس
!!

لا لا لا إزاى يعنى ..
دول ناس تاريخيه متمسكه بتقاليد المجتمع المصرى والدليل على كده :_

الفراعنه زمان كانوا مقضينها مينى جيب وىخر دلع ..
ولما بدأت الزراعه والقلع والزرع ينتشروا
بدأ الفرعون يفكر
..
وده كان مع بداية الشتا
وكلنا عارفين إن المينى جيب هتجيب برد فى العضم والركب ،،
ففكر الفرعون إزاى يتغلب عالمشكله دى
واخترع
"الكلثون"
وهو عباره عن
(بنطلون كراش واقع من عالوسط وضيق وبأستك من عند الرجلين)

ونظراً لإختلاف الأجيال والأقمشه تم تطوير "الكلثون" لحد ما بقى البنطلون الساقط
وعشان عجلة الصناعه تشتغل عملوا الحاجات ذات الألوان الفاقعه اللى عمتنا..

يعنى الكائنات الإهتزازيه اللى بتبقى لابسه بناطيل ومسقطاها لحد الركبه وشئ بدباديب أو قلوب باين تحتها
رجالـــه أوووى والوطنيه بتفط من عنيهم
"ايموشن بيغمز"

بس المشكله إن اللبس أحيان كتيره بيحدد الشخصيه
فلو واحد من دول دخل بيت يخطب بنت أكيد هيبقى عايزها زيه كده
.. بس سبحان الله
الطيور على أشكالها تقع
فى بنات بتسقط بناطيلها برده :))
دول بقى مش هنتكلم عليهم دلوقت ...

ووالد العروسه لو كان شديد ممكن يطرده مالبيت لما يشوف القلوب أو الدباديب اللى تحت الكلثون الساقط
"ايموشن فرحان"

ولو راح انترفيو فى شغل !!!
لازم يلبس بدله طبعاً .. بس ما بيقدرش
وبأى طريقه بيسقط البنطلون أصل التسقيط ده إدمان

ولازم عشان ربنا يشفيه يرفع البنطلون ،، واحده ،، واحده
لحد ما يكون فى الوضع الصح
وقتها بقى يلبس تحته
دباديب
قطط
فراخ
عصافير
براااحتووووووو ... ماحدش هيقعد يستغفر ربنا لما يشوفه

.. وختاماً
عشان يبقى الموضوع كامل يسارى يمينى ليبرالى ديمقراكى حزمبولى
الموضوع جاى من التربيه والأسره
أولاً وأخيراً
فين تربية الأم .. ووقار الأب وقعدته مع أولاده
!!!
فين القدوووووووووووووووووه


الشباب ذوات الــ "كلثون"
معظمهم قدوته مطرب أو ممثل أو مغنى راب :(
أومال قدوتهم الصح فين
!!

السلف الصالح وجيل صلاح الدين
كانت قدوتهم بعد سيدنا محمد صلى الله عليه وسلم
ناس زى
خالد بن الوليد .. سلمان الفارسى .. عمر بن الخطاب .. على ومصعب وأبو ذر ........
وناس ماللى بجد ما تنفعش غير أنها تكون قدوه

انما ..
البنطلون الساقط والشعر الكنيش
والبنت المتبرجه والشباب الضايع
أصلهم جاى مالبيت والأسره الهشه الضعيفه
اللى ما قدرتش تخرج شباب صح

ربنا يصلح الحال ... وكل واحد وواحده قبل ما يفكر فـ الجواز
يرتب حياته الأول
ويقرر هيربى ولاده إزاى,,
مش عايزين جيل جديد لابس البتاع أبو دباديب وقلوب بس
من غير البنطلون

كام ساعه بس وهبقى مش موجود هنـــا

أول مره أحس ان الوقت بيجرى بسرررررررعه أوى
وحسيت دلوقت معنى ان يكون عندى 25 سنه
وأبقى كبير أخواتى
ومسئول عن البيـــت

وحاسس ان عقرررب الساعه بيجرى
وحتــى هو مش راضى يسيبنى أقعد كام دقيقه وسط اخواتى
وأبص لأمى
حاسس انى مسافر ومش هشوفهم تانى
وقطعنى كلام اخويا لما قالى
:_ انت هتسافر وتسيبنى ومش هتيجى فى العيد عشان تفسحنى
!!!!

ودموع امى اللى كانت مخبياها .. بس كنت حاسسها
وعارف انها عايزه تترمى فى حضنى وتعيط
بس أنا اللى كنت محتاج ده أكتر منهـــا
.
.
.
.
والبت أختى اللى عملت نفسها مشغوله طول النهار وكل ما كنت أبصلها تبعد وشها
وتروح تنادى على ماما تسألها على أى حاجه
:(

فضلت أبص للجدران وافتكر
هنا لعب وهناااااك فى الركنه دى قعدت اعيط يوم ما ابويا توفى
وقعدت افتكر كلامه وفرحتى وشعلقتى فى رقبته اول ما ييجى مالشغل

وافتكرت ازاى امى كانت راجل البيت بجد وماخلتناش نحس ان ابونا مات
وانها بقت مسئوله عن عيله لوحدها

عايز اروح احضن كل جدار ومكان فى البيــت واقوله انى مسافر
نفسى أروح اسلم على عم عبده البقال واقوله الكرمله بتاعتك هتوحشنى
مع ان طعمها كان بيبقى وحش أوووووى

هتوحشنى كل حته عشت فيها .. بس مش بإيدى أكون معاكواا
وهروح بلد تانيه
بس مش هنسى اتصل على امى واخواتى كل يوم وأقولها
_ السلام أمانه يا أمى

تفهم وتبعت السلام لبنت الجيران .. اللى بترفض عرسان علشان مستنيه أول حب
وأنا وعدتها قدام ربنا انى هحفظها ومش هتخلى عنها غير يوم ما اموت
ومسافر عشانها وعشان أمى واخواتى.
نفشى احققلهم كل اللى بيحلموا بيه

بس صعب فراقهم عليّا ، وماكنتش عارف انه هيبقى صعب اوووى كده
والوقت سرقنى ومش فاضل غير ساعه وأمشى
.
.
همشى  بس سايب روحى معاكوا ،، وفى كل سجده هفتكركوا وادعى
تبقوا بخير
وأرجعلكوا بســـرعــه

************************************
ده  كان كلام داخلى من قلب شاب مصرى أصيل هيسافر عشان أمه واخواته وبنت الجيرااااان
مايعرفش اللى بيقولوه هما بقى
******
الموضوع هزااار هزااااااار ولا يمُس الواقع بشئ
هو فقط للهزار والضحك شويه :)
احم احم

***************************************
الواد اخوه المسخوط اول ما عرف انه مسافر وخلاص هيسيبله الأوضه
عزم الواد كوته صاحبه على جلاتى وقاله
_خلااااااااااص هنام عالسرير لوووحدى
ده كان بيشخر يا عم وبيسرق منى البطانيه
يلااااا من النهارده مفيش حكوووووومه :)))

***
والبت اخته اول ما الباسبووورت جاله وعرفت انه خلاص كام يوم ويمشى على بلاد غير البلاد
كانت هتقوم ترقص عشان الواد مااشى وهتبقى عدة التليفون تحت اديها :) ورقص وسُكر وبردعه طول الليل والنهار مع نيفين ونهى وسها وتقى

***
وبالنسبه لست الكل فدى كانت فرصتها
لانها من زمان كانت حاسه ان عم عبده البقال حاطط عينه عليها
وطول النهار كان نفسها تعيط من شدة الفرررررحه :D
***

وبنت الجيران أخيرااااا
الهم انزااااااح وهتلاقى حجه عشان لما تتخطب للباشمهندس عطوه اللى عنده ورشة ميكانيكا قد الدووونيا
تبقى بنت اصيله ومش وااتيه ولا اتخلت عنه
بالعكس ده اهلها غصبوا عليها وكمان هو مسافر وماكانتش ضامنه راجع امـــتى
!!

أما الحيطان والجدران والركنه اللى فاكر انه بهدلها عياااااط
:) الحيطان حيطه حيطه
بتشكر ربنا انها اترحمت من الشلاليـــط والشخابيط اللى كان رايح جاى يعملها عليها

كان مفكر نفسه دافشنى وشغال رسم عالحيطه ... وكتابة كلمته الشهيره

للذكرى الخالـــده ... على اساس انه عبد الحليم
والناس هتبص عالحيطه بتاع اوضته لما يموت

أمـــا عجايب

:D ربنا يرجع كل واحد مالغربه بسلام
وكفايه تسمعوا اغنيه انا مالبدااااااااايه يا غربه بتحمل
على خطـــى الشاب المصرى
القدوه
حزلئوم

كل هذه الإتهامات أنا أُنكرها تماماً

:D

المحاكمه كانت علنيه وشفافه
لدرجة ان ماحدش شاف اى حاجه ولا سمع ولا فهم
غير ان كل محامى يمسك الميكروفون شويه
ويقعد يقول أرقام
والقاضى يسأله
:_دفعت الرسوووم !!

يعتذر المحامى ويقدم باقى طلباته

وعليه ... وطبعا ماحدش يقدر ينسى نظرات حبوب العادلى
O.o
نظرات ثاااقبه مُتثقبه
عينه عماله تبظ مالقفص
تقريباً كان نفسه يخوف بتاع الكاميرا

والمووحاكمه كانت فى أكاديميه الشرطه :)
ربيت ولاااادك وبتتحاكم فى القاعه اللى اتطبلك واترقصلك فيها يا ريس

وبما اننا فى رمضان الكريم ،، الشهر المعظم اللى حاربنا فيه وكسبنا اليهود الشريرين
اللى كنا بنصدرلهم غاز بعد الحرب
عشان الغاز مش حلو وريحته ووووحشه
وعشان احنا طيبين
كنا بنديلهم الغاز بسعر قليل

ماهم غلابه ومش لاقين يآكلوااا ،، وحتى الأيام الأخيره
نتن ياااهووووه كان وشه مخطوف كده وباين عليــه الجوووع

عشان بقى رمضان
كان كابتن جيمى ماســك مصحف
اللهم زد من بركاته :) واحفظه

أنا مش هتريييق اهوووووو
عشان احنا صيااام
واللهم انى صاااائمه

والسؤال اللى بيطرح نفـــسه

ليــــه عملوا المحاكمه فى عز الصيام كده
مش كانوا يعملوها بالليل بعد الفطار والتراويح
عشان الناس تشترى شويه لب وحبة سودانى ويقعدوااااا

ونظره تخيليه بقى عاللى هيحصل

اول ما يدخلوا مووبارك بالسرير المتحرك
"الترولى"

ام احمد تقوم فاقعة الزغرووووده
وابو احمد يقولها
:
ايسكووووتى يا ولية عايزين نتفرج من غير صوووت

يقوم أحمد بقى رايح فاتح الشباك ومناااااادى
:_ يااااااض يا مصطفى
إلحق موووبااااااااااااااااااارك دخل القااااعه دلوقت

تقوم ام ابراهيم اللى فى الدور الأرضى بقى داخله الحواااااااار
:_ إعدااااااااااام إعداااااااام
ده تيييييييييت وابن تييييييييييييييييييت
تكوا شكه فى مفاصله وفــ فشتوووووو

أبو احمد مش ساااكت طبعااااا
:_ ادخل يا ابن التيييييييييييت واقفل الشباااااااك

محكمـــــــــــــــــــــــه ،، وتبدأ الجلسه على مسمع ومرأى من كل الناس الموجوده
ومع كل نفس للقاضى تلاقى محلل قضيات تخصص رئاسى ونصبى
عمال يتكلم ويقولك ليــه القاضى قال كده

والقاضى ليـــه مع ان شكله كتكوووت :/ كان متنرفزززز
وبيبص من تحت النظــاره
وعمال يزعق للناس اللى ماسكه الميكروووفوووون

والناس غلطانه برده "اللى هما المحامين"

يعنى الراجل من دول باين عليه محترم ولابس الروب الأسمر وعمال يخطف الميكروفون من صاحبه !!

الله .. ده كلام

سيب زميلك يلعب فى الميكروووفون يا حبيبى

كلــه هيتكلم ،، كله هيتكلم

واااااحده وااااااااااحده كـــله هيساااااافررر

ولما نيجى بقى بمشهد زووووم عالقفص
اللى قعدوا يظبطوه ويروقوووه بقالهم يومين
وايييشى مكان للسرير :) ومكان للكرااااسى
وعاملين كنبة ضيوووف ورا
عشان برده الناس تستريح ويبقى مزاجها عالى وهى بتسمع المحامين

سواء الدفاع المدنى او بتوع المُدعى عليهم

هتلاقى فى هذا المشهد الزووم ناس لابسه أبيض فى أبيض
واتنين لابسين طقمين مختلفين
عمو حبوب لابس أزرق لانه اصلا فى السجن

وعمو واحد تانى كددده معرفوش لابس مدنى
لانه براااءه والباقى أبيض × أبيض

ونظراتهم غريبه عجيبه

يعنى عمو موبارك كانت نص الموحااااكمه ضايعه منه
لانه ماكانش سامع القاضى بيقول  ايه ولا المحامين بيقولوا ايـــه

تعبتوا الراجل عالفاضى والله .. ده كان ضيف شررف فى الجلسه اللى هو اصلا تورتتها
وزينتها وحلاوتها ام حسن
ومن زهق الراااجل
حط ايده على دمـــاغه كددده زى ما يكون هينام خلااااص

وجيمى وعييييلااااء
كانوا كل شويه ييجوا قدام باباااا :) خايفين عليه مالحسد بتاع الكاميرا وام أحمد

والسيد غااالى بقى :D كان واااقف
ديـــك جوه القفص
وبنظراته الحزينه جايب كل أركان القاعه

ونظــراً لأننا مجتمع ذكورى متعفن
الست الوحيده اللى جات تدافع عن الشهداء بتوع سينا
معرفتش تمسك الميكروفون كتير وواحد ماللى كانوا واقفين كان عمال يرخم عليها
كأنهم واقفين فى اتووووبيس
"ايموشن بيغمززز"

والقاضى ماخدش بااااله على فكره

نخرج مالقفص شويه بقى ونطلع عالناس اللى بره
عجبنى اوى وكيل النيابه
!!
ليـــه معرفش
شكله برنننس كده وهو بيتكلم
وفقعهم كام تهمه جاهزه ومتظبطه :) والاسامى مرفقه فى الأوراق الموجوده
وترااااك ترااااااااااااك

قام القاضى بعد ما سمع من النيابه :) نادى على المتهمين
الاول
والتالت
والرابع

مووبارك وعييييلاء وجيمى

والمتهم اللى وقع مالنص
المتهم التانى عمو حسيت سالم
بيتحاكم غيابى

اصله سافر أسبانيا يقضى شهر استحمام هناك
لان الميا فى الشاليه بتاعه كانت قاطعه بقالها فتره

وهو على خلاف مع وزير الميا :) فخدها من قصيرها وراح يستحمى فى أسبانيا

وكل ما القاضى ينادى على واحد
يرفع ايده ويقول حااضر يا فندم

زى ما كنا بنشوف فى الأفلام يعنى العررربى
أهوووو
والقاضى بكل براءه وطيبه يقوله
:_ ماذا تقول فى التهم المنسوبه إليك !!

يقوووم المتهم راااادد بكل براءه برده
:_ كل هذه الإتهامات أنا إنكرها تمــاماً
"ايموشن بيهزر راااسه وبيقول ما عملتش حاجه"

يا حيـــــنى ... اهئ اهئ ماعملوووش حاجه

اووومال الفله اللى النيابه قعدت تعد فى تمنها دى والتربح واصدار الأومر المباشره
ببيع وشرا أراضى وعمل قوانين على مزاجهم
وكله بالامر المباشر

وغير كده بقى كان كوز البطاطا السبب فعلاً

لما يكونوااا انكروووا ... يبقى المُتهم الوحيد كالعااااااااده

"أمى اللى عملت كده"

وانا بطالب ببراااءه مبارك والشبلين ولاده

دول مظاليم يا جماحه ،، وانا بعترف على ست الحبايب
هى اللى عملت ده كلــه
وبعترف على بابا بالمره وعلى اخويا
وانا كنت معاهم

:(

هاااااااه هيفطروا الوااااحد اهووووو
ايسكوووووووووووت يا بووووئى

وبعد ما ظهر الحق فى جلسة الإستماع
وعرفنا ان بابا حووسنى ماعملش حاجه

كنت انا شخصياً مستنيه باقى الفيلم

مش المفروض بعد كل مووحاكمه يطلع واحد كده يقووووول

ماااااااااااااحكمه :)

وفجأة طلعت العلامه اللى كنت مستنياها

ماااااااااحكمه ^_^ عرفت بعدها ان المحلكمه خلصت
وان الأشرار اللى هما احنا هيقفلوا التليفزيون خلااااص
والطيبين هيدخلوا الحجز تانى

وانكل موبارك رايح مستشفى الإسماعيليه رايح جاى

يا بخته :)
الاسماعيليه فيها بحررررر
واحنا هنا ماعندناش بحر :(

وليـــه بقى مادخلش طره !!!
انا هقوووولكواااا

اصل طره كُخ ومافيهاش علاج ولا طب ينفع للمرضى الآدمين
وعشان هو كان رئيس دوله
طبعا ولا ممكن يتحط فى مستشفى وووحشه

إزاى يعنى !!
فقالوا يروح مستشفى حلوه وبعيده عن الوووش بتاع شرم الشيخ
وأهى الإسماعيليه فيها بحر
وهوااا يرد الروح

والحُكم بعد المُداوله إن شـــاء الله

ونظن وبعض الظن إثم
ان دلوقت الدعاء الوحيد للمشير طنطاوى
:_ يااااااااااارب خد الأمانه وخلى الشعب يرتااااااااااح
وخلينى أنا كمان أرتاح من الموأف دددده

عفوااا " الأمانه يقصد بها بابا حووسنى "

خوفى شويه كددده وانا  والشعب نتمسك
بتهمة السب والقذف والبلاغ الكاذب فى ناس طاهرين

من غير ضرب

ربنا يجعل كلامنا خفيف عليهم ،، ومافيش أى حد يزعل ولا يآخد الكلام على نفسه
اصل احنا عارفين ان كل الولاد كويـــســــين جدا
وما فيهومش عيب
والبعض فى القله القليله منهم هو اللى وحش وكُخه
وبيبوظوا سمعة الشباب

بس الولاد الحلوين ماشاء الله عليهم
اول ما يقوموا الصبح :) ابتسامه عرررريضه
ويقوم يدور على الفوطه بتاعته ويآخد فرشة السنان فــ ايده
ويدخل يآخد شاااور الصبح

ويدخل يبوس ايد ست الحبايب :* امواااااااه
وراسهاااا
اموااااه اموااااااه ويحطلها الفطار عشان تفطر
" ايموووووشن مش قادر ووقع عالارض من كتر الكذب "

وبعدين بعد ما ست الحبايب تفطر هى وسيد الحبايب
الشاب الأمور يشيل السفره ويحط الاطباق فى المطبخ
ويحلف على امه انها مش هتغسل حاجه

ويآخد الأطباق بسرعه فومين وهو واقف كده .. واهو بالمره يكون عمل دور شاااى

ويآخد الشاى والبسكوت ويخطب على اوضة سوسو اخته
...
تاك
تاك
تااااك

_ حبيبتى سوسو ،، اصحى عشان عملتك الفطار

ويدخل يحطلها الأكل على مكتبها ويلطعها بوسه على خدها قبل ما يخرج تانى
:* امواااااااااااااه

ويكمل يومه على كده بمززززيد من كل حاجه حلوه وفى آخر اليوم يكسب دعوه حلوه من ست الحبايب لما تقوله
:_ إلهى يحرسك مالعين وتكبر ليا يا محمد
:D
وطول النهار بيبقى بيروق اوضته وبيشيل هدومه يحطها فى الدولاب على الشماعات بتاعتها
ويغسل الشراب بتاعه عشان لبسه امبارح وهو ماشى فى الصاله
وهو  مش بيحب يلبس شراب مرتين ابداااا


انما بقى الشريررررين الوحشين
دول انواعهم كتير مع انهم قليلين جدااااا فى البلد
يكااادوا يكونوا مش موجودين اصلا

وأول حاجه هيعملوها انهم اول ما هيقروا الكلام ده هيقولوا
:
الحمد لله انا مش كده ،، ومش بحب الراجل اللى كده
وببصله على انه مش راجل اصلا ;)

حلاوتها ام حسن مالعين ومالحسد ،، وحلاوتك يا حســن

الانواع دى مُختلفه ومتنوعه
يعنى على عينك يا تاجر واللى ما يشترى يتفرج

منهم اللى تلاقيه مطلع عين ست الحبايب وبنت ست الحبايب وجوز ست الحبايب
واول ما يطلع مالبيت التقوى والايمان ينزلوا عليــه مره واحده
ويعمل فيها مينا موحد القطرين
واى خناقات بين اصحابه أو اهل اصحابه
يدخل يحلهـــا

واى حد يقابل ست الحبايب يقولها
:_ بصراحه عرفتى تربى ،، ابنك لا حول ولا قوة الا بالله
حاجه كدددده ما تتكررش
O.o
طبعا ام الواد واقفه مكسووووفه تقولهم ده واد تيت
ولسه ضارب اخته وسارق فلوس ابوه ومعلق المحفظه بتاعته

فالسكوت بيكون الحل الأمثل

وفى أنواع تانيه بقى شخصيات بلاستيــــك
حاجه كده هوااااااا
مالوش رأى :(
وتقدر تقنعه بأى حاجه وبأى كلام ... وده عادة بيبقى شبه البنوتات وبيتكسف من خياله
ولو بنت سألته
_كابتن ،، كابتن هى الساعه كام !!
هيتلبخ ويقولها
:_ مش عارف .. اصلى مش من هنا

وفى بقى ناس ولاد حلال :) الواحد بيقابلهم فى كل حته
دووول بقى بيبقى عندهم فصام ومخهم تعبان جدااااااا
ازاى بقى !!!

تلاقى نفسك بتتعامل مع اتنين .. بس الاول بتبقى مخدوع ومتهيألك انك بتتعامل مع شخصيه واحده
ولما تبدأ المواقف تدخل فى الجد
هتلاقى الشخصيه اللى كانت منظررر وحد مسئول وعارف كل حاجه فى كل حاجه
ورأيه من دمـــاغه ،، و  و  و و  وحاجات كتير

طلع عيل !! وكان لابس ماسك
وكل اللى قاله اتهد
ومش لاقى غير ووووش تعرفه مش أكتر
انما الدماغ والهيلمان راح فين !!

ماحدش عارف

وفى بقى الواد الروش الاستايل اللى ماحدش عاجبه
بنات ،، ولاد ... ماحدش مالى عينه

عامل فيها ديك البرابر فى شلته .. وفى معظم الأحيان بيبقى اللقب بتاعه البوص
او البرنس
او الريس
او اى لقب فيه رياسه وحداقه كـــده

وفى أغلب الأحيان بيبقى لابس نظاره واول ما يشوف بنت حلوه يدير عينـــه ويرفع مناخيره فوووق شويه
كأن الأرض ما فيهاش هوااا يعنى

ولما يدخل واد دمه خفيف عالشله يبدأ أخينا يخاااف منه :(
ويديه كام إسفين وكام بومبه لحد ما يطلع مهزووووم

وفى العموم الريس هو اللى بيخلع من الشله وبيغير اسم الأكاونت بتاعه لــ
" طائر الليل الحزين "

وفى كائنات ليها ملامح رجوليـــه شوووويه
بس مش كتير
وبتبقى طريه شويه كده وجسمها يشبه اى سائل هلامى قابل للإهتزاز
ودايماً لابسين سلسله أو انسيال وحظاظه :)

حبـــيـــب قلبـــى

ونسيت اللباااانه :))
تاااك تاااك بوووووم
(دى البووولينه اللى بيطرقعوها باللبانه)

دول بقى مش هقول عليهم حاجه غير

حسبى الله ونعم الوكيـــل !!
وبصراحه انا فخووووره انى أرجل من الأنواع دى...

وفى أنواع رجاله استفزازيه
دول مش وارهم حاجه ولا شغل ولا مشغله غير الاستفزاااز فى كل خلق الله
يشوف ست الحبايب يقعد يتكلم معاها لحد ما تسيبله الشقه خاااااااالص وتهج مالبيت
وبعدين يخش على اخته الغباااانه
ينزل عليها بالطلبات
_ قومى اعمليلى شاى.. وهاتيلى الاكل وبعدين تعالى ادعكيلى قفايا اصله واجعنى أوى
وطرقعيلى صوابعى أصلها مش بتطرقع من أمبارح

ولما يقع حظ واحده بنت حلال فيه وتتخطبله
يعمل فيها 7 رجاله فى بعض ويفضل يتحكم فيها كأنها شقه ابوه جايبهاله
والبنت فى الآخر يا اما بتفشكل الخطوبه
يا ترضى بنصيبها وبتتطلق بعد شهرررر
يا اما بتدخل المستشفى تشيل المراراه

وفى نوع بقى افتكرته
هو النوع الراااجل أوى
"فى بيتهم وعلى مراته بس"

يلاقى اخته الصغيره او الكبيره لابسه عبايه وكعب رجليها باين
البيت يقف وما يقعددددش
_ يا هاااااااااانم غيرى هدوووومك واللى انتى لابساه ددده

وهوووبا يقوم واخدها قلمين على كام كف حلو كده فى اى حته
ويقلعها العبايه ويقسمها نصين
ويقولها:
_ مفيش نزول فى حته ولا مرواح كليه ولا كورسات
انتى تقعدى فى البيت تتعلمى الطبيخ مع امــك

والست الوالده تيجى تتكلم.. ده يجعرله شويه ويقووولها
:_ انا قووولت وكلامى هيتنفذ

ويدخل اوضته يأنتخ فيهــا .. واللى يغيظ ان اللوح ده ما بيبقاش بيشتغل
ولو كان بيشتغل فهتبقى فلوسه كلها رايحه على ايده هووووو
وما بيطلعش 5 جنيه يديها لمامته كل اول شهر
وعايز الاكل بتاعه ولبسه مكوى وكل حاجته جاهزه

كأنه مخلوق عشان كل طلباته تبقى مجابه من قبل ما يطلبها
وعلى فكره اللى بيبقى كده بتكون شخصيته ضاااايعه مع اصحابه بره

ماهو ما قدرش يتشطر عالحمار ،،، :(

وفى الشاب النحنوح
ده بقى يا قططى بيبقى عنده اكاونت عالفيس بوك
وحاطط صورته شمعتين او قلب مثلا ومكسور او صوره حزينه
ومكتوب عليها
" ان لم تكن نصيبى .. فستظل حبيبى "

وتلاقى الانفورميشن فيها كام كلمه من اغنيه على كام جمله جايبهم ما تعرفيش منين
وعامل فيها عبده الحزين

_ مافيش حاجه اسمها بنت محترمه
_ماحدش بيحب بجدددد
_انا عمرى ما لقيت بنت مخلصه
_انا عايز اموت

يا عم موووت وريحنا من الأشكال دى
:(
لما يكون ولد اكبر مشكله فى حيااااته مشكله عاااطفيه
!!!!!!!
ده يبقى مش رااجل فعلا ،، وماحدش يقول لاء ده حساس ومش عارف ايــه
لاء
ده راجل ضعيف .. ومش لاقى حاجه تشغله فى حياته
فقرر انه يستهيف ويعيشله يومين فى البتنجان اللى طبخه لنفسه ده


وفى بقى الواد الحلو اللى سابق سِنه :)
حبووووب ووسيم ومنزل صوره كلها عالفيس
حتى صورته وهو طالع بالفوطه من الحمام
نزلها عشان جيجى وشوشو وتوتووو يعملولوا لايك
وبيييس
قشطه يا ماااان .. جامده اوى الصوره ددددى

وده بقى حبيب الملايين ومستعد يحب فى أى وقت وغالباً ما بيكون عاطل ومش لاقى حاجه يعملها غير الاشتغالات فى خلق الله
^__^
ودايما سايب رقم موبايله على الوول بتاعه من برررره

اهو يشغل نفسه بموووعاكسات الموبايل شويه


وفى رجاله بتستفزنى انا شخصياً
الراجل النطــع

وتعريف الراجل النطع هو
:
اى راجل يرمى الحمل على اى حد معاه ويقول انا ماااالى
او اتصرررفوا انتواااا
ويقعد فى البيت يتفرج على التليفزيون
ويستنى من مراته تنزل تشتغل
!!!
هو الحال اتقلب ولا ايـــه
:(


وفى الراجل البلونه :)) ده بقى نكته
يفضل يقنع اللى حواليه انه مثقف وفاهم كل حاااجه فى الدنيا دى
واول ما يتزنق بجد فى حاجه مهمه او موقف يخليه يبان على اصله تلاقيه فررررقع

والأصناف دى طبعاً مش موجوووده غير كل فين وفيــــن

ونادر لما نلاقى حد من دووول فى حياتناااا

فوتوكوا بعافيــــه
ونسيت اكتب ان اللى مرارته بتتفقع بسرعه ما يقرآش مالأول

بس سامحووونى بقى ماخدتش بالى :)

رقة البنات

البنات بلا أدنى شك أرق المخلوقات الموجوده على وجه الأرض
ومين يشهد للعروسه بقى :)
وده مش كلامى لوحدى ده كل الناس بتقول كده
ودراسات علميه اتعملت .. وكرستوفر كرومبو المكتشف العظيم كتب فى مخطوطاته إنه اكتشف البنات بنفسه .. وقال فينا
:اننا أبسكت بسكوتات الأرض

حد عنده اعتراض !!! هتعترضوا عالتاريخ ؟
كله متسجل عالسى دى بتاع مرتضى منصور
وده سبق صحفى اهووو
عرفتكوا السى دى فيه ايــه

ده كفايه إن البساطه والرقه وصلت للبنات انهم ما يلبسوش حاجه واكتفوا بلبس استرتش وفوقه بضى !!
شوفتوا البساطه .. ولا كأنهم رايحين ماتش اعتزال كمال اجسام

ورقة البنات تقدروا تتفرجوا عليها فى أى كافيه شوب وهى قاعده مع الدوج فريند بتاعها.. تلاقيها بتحسس عالسندوتش وبتشرب العثير بطراطيف الشاليمو
"ماحدش شافها وهى فى بيتهم لما بتهجم عالطبق بإديها الاتنين وتشرب الشوربه بالطبق"
ششششششششش ده الصوت اللى بتعمله وهى بتشرب

وطبعاً اى بنت فى التليفون بتبقى عصفور بيغنى تقولش "داليدا"
والفرق بيبقى رهيب بين التليفون والجعير أثناء زعيقها مع حد من أخواتها

ولو عايزين تكتشفوا الرقه بجد اقعدوا اتفرجوا على بنتين بيتخانقوا
"رفص وشد شعر وحركات بالإيد والرجل الناس بيسموها شرشحه ، ده غير التفوه ببعض الألفاظ اللى كلها بتنتهى بــ تيييييييييت"

ولا اما تكون قاعده مع خطيبها فى بيتهم ويظهر صرصااااار
دى تبصله بصة القناصه وتوطى عالارض تمسك فردة الشبشب
وبوووووم مره واحده بالخطوه السريعه تنزل على الصرصار
كأنه صهيونى وقع فى ايد ناس مصريين دمهم حامى
ومش تضربه مره واحده
لاءءء
اربع خمس مرات :) عشان تتاكد انه استشهد

واكتر رقاقه فى البنات لما تكون فى سفر مع باباها وراكبين العربيه وهى طول الطريق بتزن عليه عشان تسوق والراجل من خوفه على عمره يقولها اتهدى يابت
وخلاص لما يقربوا يوصلوا يقفوا على أول الميدان عشان توكتوك ابن الحلال معطل الطريق

قابل الرقه بقى يا شقيــق :D

البنت من دول تسكت الحاج وتقوله :
سيبلى أنا الطلعه دى
وتفتح باب العربيه وتنزل لبتاع التوكتوك
وبسرعة الصوت تلاقى كلام ما بيتفهمش منه غير
ويك ويييك ويييك ويك وصويت ستات !!!!

وأبوها أول ما يشوف المنظر ينزل عشان يدافع عن الراجل بتاع التوكتوك
وبتاع التوكتوك يبقى مش عارف يعمل ايه !
وبعد ما تخلص القصيده تتدحرج تانى عالعربيه وتقولها لباباها بكل براءه
:
يلا يا بابا سووووق

بس حقيقى بتاع التوكتوك اللى عكر مزاجها

ولو قعدنا نتكلم عن رقة البنات مش هنلاقى ورق
وأى بنت هتحاول تضرب أو تعمل اى فعل عدائى
أنا بعترفلها انى اتعرضت لضغوط خارجيه وابتزاز عشان أكتب الكلام ده
وخطفونى وكهربونى وجروا ورايا الكلاب اللولو
:(
اهئ اهئ اهئ 

 

أبو بقلظ | أم بقلظ

ماما
كلمه أول ما أى بنت تسمعها بتحلم بإبنها وهى شايلاه
وأنا حلمت بيها بعد ما بدأت أفكر فيك يا مَن أنت حبيبى
وشكلك كده مش جاى واستحليت القعده فى كوكب المريخ وسايبنى عالأرض لوحدى .. تعالى بقى وما تستهبلش

حلمت بيها معاك أنت ونفسى حد يقولى يا ماما
بس يكون ابنى مش أنت :)
عشان بعض الأزواج اللى أنت مش منهم أول ما بيدخل عالشقه بيصرخ بصوت تخيـــن:
يا أبله .. يا هااانم .. فين الأكل يا ماما !!

طبعاً وقتها هكره ماما والأمومه والجواز وسنينه
عايزه ماما من ابنى اللى هيكون شبهك .. حته منــك ..
ولما تنزل على شغلك وتوحشنى أدخل أبص عليه وهو نايم

_ملاك يا اخواتى ملااااك .. ماحدش يقدر يصدق ان أى طفل وهو نايم هو هو نفس القرد اللى بيكسر فى الشقه طووول النهار

أكيد أنت هتحبه أوى وأول ما تيجى هتجرى على أوضته تبوسه ولما ما تلاقيهوش تجيلى مبسوووووط وتقولى:
_هو بُقلظ عند ماما !!! أخيراً سربتيــه

(بُقلظ).. بضم الباء والقاف واللام وسكون الظاء :)
اسم رومانسى ورقيق أوى

وعمرى ما هسرب بُقلظ
ده أنا ممكن أكون وقتها رابطاه فى رجل السرير أو رمياه عند الجيران يلعبوا بيه شويه

نفسى أقولك : حبيبى يا أبو بُقلظ
وترد عليا تقولى :
عليكى وعلى بُقظ يا أم بقلظ ^__*
وهيكون حقك بصراحه أصل نفسى ابنى يكون شقى ودمه خفيف وهستنى عليه لحد ما يبقى عنده 4 سنين
وأوديه مسجد يحفظ قرآن :) وهخليك أنت اللى تعلمه ازاى يصلى عشان لما يشوفنا بنصلى يجيب سجادته
ويقف وراك ....

عايزه أجرب شقاوى العيال الصغيره وإجرامهم
 تفتكر أول ما يمشى شويه ويعرف يتنطط ويلاقيك بتصلى هيعمل ايه !!
ممكن يستناك لحد ما تسجد ويركب على ظهرك
ويقولك :
حاااا  وتينى الأوتــه حند مامتشى :)))

وأنت تفضل ساجد ييجى 10 دقايق لحد ما أشوفك بالصدفه وأشيله وأخبيه منك فى الأوضه :D

شقاوة بقلظ هتبقى بريئه أوى .. وأنا هحبها وهحبك أوى أوى
عشان أنت أبو بقلظ والواد طالع رخم زيــك

هفرح كل ما حد من عيلتى ييجى ويبوسه ويقولى
:
بس الواد طالع وحش أوى كده ليه ،، ده مش شبهك خالص :/
اقولهم: ده شبه باباه وزى القمــر :*

ولما حد من عيلتك ييجى يبوسه ويقولك :
شبه عيلتهم خالص ومش واخد منك حاجه !!
وأنا وأنت نبقى شايفين إن بقلظ واخد مننا احنا الأتنين
وما نسمعش لأى حد :)

عايزاك أنت اللى تربيه وتعلمه إزاى يمشى
وتجرب تاكله ويوقع على هدومك كل الأكل وهو بيلعب معاك
عايزه بس أشوف شكلك أول ما تشيله ويخليك تغير هدومك
بسبب الهزار البايخ اللى الأطفال بيعملوه مع أى حد
وفى أى وقــت :))

بس خوفى أنت وبقلظ تعملوا عليا حزب معارضه وتآخد الواد لصفك
وعلى فكره
أنت اتأخرت شويه يا أبو بقلظ
سلامى ليـــك " ايموووشن فاااتح دراعااااته "
ولكل أبو بقلظ اللى معاك
وقولهم ييجوا بسرعه لأن البنات على كوكب الأرض قربوا يشدوا فى شعرهم

الحقيقه المُره

عيبنا احنا البنات لما بنيجى نحلم مش بنستغطى أوى..
وتلاقى اللى نايمه رجليها مكشوفه والتانيه نايمه اديها مكشوفه
إلخ إلخ إلخ
"ايموشن بيغمز بإستهبال"

بس أحلام البنات بعد الثوره بدأت تنحصر فى :

إن مصر تبقى أحسن وحزمة الجرير البرادعى يعرف تمنها بكام عشان يكبس عم عكاشه :)
وإن العريس ييجى ويخلصها من الدعوه اللى حفظتها عن ظهر قلب من ست الحبايب
:_امتى ييجى اليوم بقى اللى اخلص فيه منك

..
بس زى ما قلتلكوا أحلامنا بيبقى مبالغ فيها جداًاًاً
وفارس الأحلام بقى أبو ليموزين أبيض ،، وفيلا فى العاشر
ويبقى شبــه عمر الشريف :D على اساس إن الأموره هتمثل معاه فاتن حمامه فى سيدة القصر
وتفضل البنت مننا تحلم وتحلم ،، وتتخيل !!

وحقيقة الأمر انها لو جات بصت ورتبت الحاجات اللى بتحلم بيها مش هيطلعلها فى الآخر عريس ..
ده هيبقى كائن فضائى كده يا بنتى !!!

وعشان ننزل شويه على بلاط الواقع أحب أعرفكوا إنهم بنى آدمين زينا ومش هيبقى حيلته ليموزين ولا شاهين حتى ..
ده أنتى هتبقى اتجبرتى لو طلع عنده توكتوك

فارس أحلامك بيصحى عــادى منعكش وعينه معمصه
( الله يحرق الأفلام اللى فيها كان احمد رمزى بيصحى زى القمـر )
ودول أول ما بيصحوا يقوموا يجروا عالتلاجه
وتلاقى بقدرة قادر كل اللى فى التلاجه اتنسف
وده بس مشهد صباحى
هيعدى على حضرتك كل يـــوم

وما تحسبيش انه هيقوم يآخد الشاور ويلطعك بوسة الصبح :* على خدك أمواااااااه
_ حبيبتى صباح الخير ^__^

نيهااهاااهااااا بتحلمى يا قــطه :)))

ده لو خد الدش يعنى بعيد الشر هيدخل عالمطبخ يشقلب حاله
ويمشى فى الشقه رايح جاى .. ومش هتعرفى بيدور على إيــه !!!

وبيهرشوا عادى برده وبيآكل بإيده ..
يعنى ما تعمليش حسابك تخلصى فلوس أبوكى على طقم شوك ومعالق مُدهب .. وممضى زى أطباق نابليون

حبيتى آخرك تجيبى معلقتين بس :) وحلو أوى على كده

وطبعاً دولاب الولد مشهد يستحق المشاهده ,,
حاجه كده كوكتيلك .. ممكن تلاقيــه عامل شماعه ومعلق عليها جزمتــه
عاااااااااادى يا أمى ما تتخضيش ..
دى علامة النظام
"ايموشن وقع عالأرض من كتر الضحك"

ونيجى بقى للكبيره والأخيره عشان ما تتعقدوش اكتر من كده وتفقدوا الأمل

النووووووم
بنحلم نحن البنات بفتى أحلامنا وهو نايم زى الأطفال
وش ملائكى
وهدوء بقى وابتسامه خفيفه وهدوم نظيفه

بت !!!
فووقى ضربه فى بطنـــك
وتخيلى معايا الحقيقه المُره :(

لمــا بيبقى بيفصل وخلص سهر مع اصحابه هيدخل يقلع اللى فى رجله
لو قلعه يعنى
و ............ " الواد بيغير "
أحكى يعنى ولا ايــه !! عيب عيب
خلاص غير هدومه .. بيرمى نفسه عالسرير من غير غسيل رجل ولا وسنان ولا وش حتى

وحاجه من اتنين يا بيبقى لابس طقم السجون
"حاجه كده كت وفوق الركبه وأبيض × أبيض"
يا بيبقى لابس بنطلون ترنج ومشمر رجب البنطلون
لحد الركبه !

وماحدش بيبقى عارف سر التشميره دى ايـــه
وفوق البنطلون القطعه الكت من طقم السجون ،،
الشعر المنعكش والوش الملائكى اللى بتحلمى بيــه
بيكون فاتح بقه على وسعه وخاج منه أصوات غريــبه !!

خارجه من جوه جوووه جوووه المعده
ويصاحبها تقطيع وعزف غريب مُنفرد من المناخير
ده غير طبيعة النوم أصلا

حصــان نايم فى السرير واخده جرررى طول وعرض
وحاضن 7 مخدات !!
كأنه عامل كرنفال
"كلنا مخده واحده"

...
بس طبعاً أنا فتى أحلامى غير كده خالــص :D
"ايموشن بيطلع لســانه"

نجوم ولكن !!

احنا النجوم بنتعرض لضغط ررررهيب بمعنى الكلمه
واحنا طبعا كلنا نجوم وكل واحده فينا حتى لو مش واخده بالها انها نجمه
أحب اعترفلها دلوقت انها نجمه وست النجوم كمان

ايوه كده يا أوووختشى خليكى واثقه فى نفسك
وده الجمال جمال الروح .. روّوّوّوّوّح :)

وحبيت بس أفضفضلكوا بشويه حاجات ماللى بتعكنن صفو حياتنا وبجد بجد ربنا يصبرنا

مالحاجات الكبيره المستمره اللى بتواجهنا
الاحباط :(
وده بتقوم بيه الست الوالده لما تلاقينا ماسكين أى مرايه أو واقفين بالصدفه قدامها
تقوم قايمه بالواجب وزياده وتدينا الكلمه التمام
:_ بتبصى على ايه يا موكوسه انجرى اغسلى المواعين بدل ما انتى زى قِلتِك فالبيت كده ..

احم احم .. ما بيبقوش مقدرين أهميه المظهر والمرايات بالنسبه لينا

وفى نوع تانى مالإحباط ده بيتولى تنفيذه كائن غتت اسمه اخوكى الكبير
يوم ما واحده فينا تتشملل وتدخل المطبخ تسلق بيضه ولا تحاول تعمل كوباية كابيتشينو
يبدأ بقى الأخ
بغمزات وهمزات من تحت لتحت
:_ يا خايبه .. بقيتى طول العمود وما بتعرفيش تطبخى
هتتجوزى وترجعيلنا بالكحك سخن !!

طبعاً نفسيتنا بتبوظ من كلام زى ده وبنزحل .. اومال ايه يعنى احنا بنحس وعندنا دم يا ناس

وبنتعرض أوقات موسميه مالسنه لضغط خارجى عشان ننفذ للأسره طلباتهم فى البيت

أول ما يظهر موديل جديد ولا موضه جديده "ايموشن بيبرق عينيه" بنكون كدددده
ونفسنا فيها حتى لو الدولاب بتاعنا مش بيقفل ...
ونبدأ الزززن
ونستخدم الأسلحه الأنثويه من كل ناحيه وعياط وتجعير طول النهار ..
عشان مطالبنا الموضيه

وطبعا فى الآخر مافيش حاجه بتيجى

واللى بيغيظنى بقى التطــفل .. هووووف
تطفل من كل الناس بطريقه تضايق كل الناس
صحافه وتصوير فى كل حته
حتى فى البيت تطفل من أى مسخوط صغير بيقولوا عليه اخوكى الصغير
لما تخرجى بس نص ســـاعه وترجعى تلاقى القرد الصغنن فاتح كل أدراج المكتب ومطلع كل حاجتك وبيلعب بيها :(
وبتعانى اكتر فى الحته دى النجوم اللى بيستعملوا بويه ومكياج ..
لان القرد العثل بيكون استعمل وجرب كل انواع الروووج وملطخ بيها وشه
وكل انواع المانكير على صوابعه
وبقى شبه العفريت

وقتها بقى بننسى النجوميه وبننزل بفاصل الشتيمه وجررى بقى وشغلانه
:
:
_ انت يا كلب البحررر ايه اللى بتنيله ده ، مااااماااااا شووفتى بوظ حاجتى ازاى
اطلع برررره أوضتى يـــــــااااض

طبعا بيطلع يجرى بس وهو ماسك أى حاجه فى ايــده

ولما الست ماما تعاين الموقف ترد بتباطئ المجلس العسكرى فى سرعة محاكمة رؤوس النظام وتقول :
_ انتى جايه ومطلعه زرابينك علينا ليــه !!
هتعملى عقلك بعقل عيل صغير .. سيبى الواد يلعب براحته

شووووفتوا الظلم اللى احنا النجوم بنتعرضله !!!

وطبعاً للنجوميه ضريبه بندفعها لما نآخد مقالب وإسفينات :)
بس العدل فى الضريبه دى انها يوم ليك ويوم عليك
وبتكون متنوعه ما بين ان نجمتين يتفقوا على نجمه شايفه نفسها شويه ويكسروا مناخيرها
أو نجمه تنقل كلام غلط وتوقع بين نجمتين .. بس من غير ما تكون قاصده :D

وأكبر مقلب ممكن نجمه تآخده لما نجمتها الأنتيم تلطش الواد اللى كانت حاطه عينها عليها :))) فتضطر بقى تخش فى اسبوع إكتئاب لحين المخمخه فى انها ازاى تفشكل الموضوع وترد ليها القلم قلميــن

بجد احنا بنتعب .... الله يكون فى عونّا :)

اشوفكوا بخير يا نجمه منــك ليــها :*

بحررر

فى وسط الحر اللى احنا فيه ده فكرت فى البحر وحسيت ان خلاص شوووويه وهسمع صوتك وانت بتقولى حبيبتى اعملى حسابك هنروح المصيف يومين
!!
:) أول مصيف هطلعه معاك يا بعلولتى يا حبيبى
شووووفتك يابت انتى ياللى بتضحكى على بعلولتى دى .. اصلى ان شاء الله ناويه ادلع جوزى .. بس مش هقوله يا بيبــى

بعلولتى يا ترررى هطلع معاك مصيف امــتى !! مش مشكله لو كان متأخر شويه
انا عموماً مش مستعجله أوى عالمصيف
وممكن أروح أتمشى على كوبرى الرباط اللى عندنا وآهى أى حاجه تصبيره لحد ما سيادتك تيجى أرض الوطن فى بيتنا بالسلامـــه

أنا مش هقولك انك اتأخرت واستعبطت ولا أى حــااااجه اهوووو
ولا هزعق ولا هعلى صوووت كيبوردى ولا أى حــاجه :) وهفضل مؤؤدبه
هااا ،، عاجبك كــده !!!

ولما نطلع المصيف هيكون فيــن !!
أكيد مش مارينا ولا شرم ،، الحاجات دى بيئه وأجنده
وانا فلول وممكن انت تطلع حزب كنبه
يعنى اتجاهاتنا السياسيه مش هتسمحلنا نروح مصيف هنـــاااك

بس انا مايهمنيش المكان ، انا بس عايزه أبقى معاك
وعايزه اعترفلك بحاجه ،، انا مش بطلع مصيف كتير  بس نفسى اطلع معاك انتَ
عايزه اتمشى معاك عالبحر واجرى وارميك بالميــا
ونقعد عالشط زى العيال الصغيره ونبنى بيت صغير بالرمل

وبعد ما نخلص البيت ييجى واحد ضخم يدووس عليه :( وانت تبقى خلااااص على آخرك وهتقوم تضربه
أبصلك واضحك وأقولك عديــها ده ضخم وممكن يضربك :))
حبيب قلبى ساعتها طبعا ممكن تشيلنى هيلا بيلا وتغرررقنى
^__^ وانا اصلا مش بعرف أعوووم

نفسى اطلع معاك فى بحــر بعيـــــــد ما فيهوش أى حد
ونكون لوحدنا عالشــط ،، ماحدش يفهمنى غلط ده
عشان بس نكمل الرومانسيه ونشوف الشمس وهى بتغُرب
عايزه اشوفها معاك أنت وبـــس
هتبقى أحلى من  أى مره شوفتها وكفايه أكون جمبك أنت وانا بشوفها
عشان مش هبص للشمــس .. انا هبص لعينك انت واشوفها فيــها

:$ أكيــد وانا معاك هنسى انى جعانه .. مع ان الاحساس ددده صعب شويــه لان الجوع كافــر وانا ما اقدرش أوعدك بأنى اصبر عالجوع
بس الأكيد الأكيد انى هنسى بجد أى حاجه وفى آخر اليوووم أقع من كتر التعب
وأنام ما أحسش بأى حــاجه وتانى يوم نصحى نروح تانى عالبحر

وتشتريلى فريسكـــا :) واحده بالبندق وواحده بالعجوه
ولما نقعد نآكل سمــك وتكون جايبلى كل الأنواع الغاليه عشان ما تحرمنيش من حاجه
اتكســف أقولك انى عندى حساسيه ومش بآكل سمــك
وأقعد آكل معاك ، وتبص تلاقى وشى أحمرررر وبدأت أتحول :)))
وكل جسمى قلب ألوان .. واعترفلك ان عندى حساسيه
ومش هتبقى الفرحه سايعانى لما ألاقى وشك اتقلب أزرق مالغيـــظ وبدأت تنزل عليا أصواتك وأنت بتزززعقلى عشان ما عرفتكــش وتآخدنى بسرعه عالمستشفى
شووووف قد ايه هبقى عيانه ومش قادره وعايزه حد يمسك ايدى عشان ما اهرشش
بس هبقى فرحانه عشان حسيت انك بتحبنى وبتخاف عليا
مالهرش :D

بحبك حتى لما هتبقى متنرفز او لمــا تبقى عايز تعلقنى من قفايا
عااارف انا بس مش عايزه يبقى بس احساس البحر اول حاجه احسها معاك
عايزاك انت اللى تورينى الدنيا بعينك
وتخلينى اسافر فى كل الاماكن اللى انت بتحبـــهااا
وتقولى انت بتحب ايــه ومن غير ما حس ألاقينى بقيت بحبه أنا كمان
......
وأنا بحبك قد البـــــــحرررر وواحشنى قد الســـمــا

زمانه جاى :)

أوشك يوم كئيب على انه يخلص .. وكنت فاتحه الفيس كُخ وعملت كومنت على شخبوطه كنت بدعى فيها للمحروس اللى لسه ما جاش
قامت صبحتى أميرة الورد ردت عليا بكومنت سريع بقوة مينيت واحده بعد كومنتى الأولانى
بتقولى فيه:
_زمانه جاى :)
الكلمـــه رشقت جوه قلبى أوووى
يااااه زمانه جاى
وبما إنى مالناس اللى بتتلكك عشان تفرح خدت الكلمه من هنا وطبل ولوووولوووولووولى ،، ده زمانه جاااى

يعنى ممكن دلوقت ألاقى الباب بيخبط
وواحد أفندى لابس البدله اللى عالحبل
وماسك فى إيده نص دسته جاتوه من عند السنيطى
وحاطط ورده بيضه على صدره والمنديل الاحمر فى الجيب الشمال، ومنعكشه زى ما فؤاد المُهندس كان منعكشه فى فيلم أنا وهو وهى
والإبتسامه هتبقى على وشه من هنا لــهنا ....

ده قبل ما يدقق نظره اوى ويشوفنى
وأنا طالعه بالزعروره اللى عملاها .. ولبس الطفوله المُتشرده اللى لسه بلبسه
ولو بص تحت شويه هيشوف رجلى والشبشب اللبنى أبو صوباااع مزينها

نيهاهاهاهاااا  ،، مالآخر هيطلع يجرررررى

بس على مين !!
أكيد وأنا بتخيل إن خلاص العريس عالباب عملت حسابى على أى حركة أو رد فعل هروبى
أول ما ألاقى وشه إتخطف !! وعينه برقت ×.O !!
ورجله بدأت ترجع لورا ..
هبدأ أشتغل بقــى

أنعكش الشويه المتسرحين من شعرى
وارمى فرده من شبشبى وأصوت  يا لهوووووويززززززز
وفى ثانيتين هلاقى أخويا سَبِع الرجال وبابا عالباب
وبكل براءه والدموع بتنهمرررر هقولهم:
حاول يتهرش بيــّا :D

لا لا لا .. بابا وقتها هيمسكنا احنا الإتنين ويسلقنا فى الحله ويعملنا كوارع ومُومبااار
امممممممممم .. هو الحل الأسلم انى أطلع أجرى على أوضتى فى السريــع
وهو يقعد مع بابا .. "ماهو لو نزل تيتا هتمسكه تحت :) "
وماما تفضل تحوش فيّا وأخويا يكتفنى فى رجل السرير 
أكيد هبقى بحاول أدخل أجرى امسك فيــه
وأقول لبابا :
عرررريس يا بووووووى

وبعد القاعده اللى مش هتآخد أكتر من ربع ساعه
ألاقى صوت بابتى حبيبى بيقوله:
وعليكم من السلام ، هنبقى نرد عليك
ولما بابا يدخل عليّا الأوضه أعمل نفسى مشغوله فى نعكشة شعر الدبدوب
وبابا يضحكلى ويقولى المفاجأه والخبر اللى معرفوش
:
_كبرتى يا بغله وجايلك عررريس
طبعاً تخيلتوا منظرى ،،
الأدب هينزل عليّا مره واحده وكسووووف بقى ووشى يحمرررر :$
وأقوله : _ اللى تشوفه يا بابا :)

طبعا هو رد واحد اللى مستنياه من بابا فى موقف زى ده
_ آه يا بنت الــ..... " تم المسح من قِبل الرقابه " :D
انتى لسه صغيره عالجوااااز ، تعالى شوفى بنتك يا مدااااااام

وتبدأ حلبة المصارعـــه 
ماما تقوله البت قدها واتجوزوا وخلفوااا
وبابا يقولها:
لاءءءء لسه صغيره ..
وأنا بقى أنتحررر فى النص
اهئ اهئ اهئ  .. ايموشن بيستهبل وعامل بيعيـــط

بس الراجل بابا عنده حــق
توء توء توء .. هو هيخلينى أغير مبادئى ولا إيــه !!

وكمان ده أنا بتخيل لما محروسى ييجى
وده زمانــه جاى ... زمانه جاى

يعنى شويه قد كده وهلاقيه بيخبط

تاك
..تاك
      تاااك

حـــد سمــع حــااااااجه ؟؟؟؟!!!       
      

محتاجاك

محتاجاك دلوقت حالاً ...

عارف يعنى ايـــه اكون عايزه حضنك انت بالذات ، دلوقت بس اتمنيت انى اكون متجوزه عشان اهرب مالناس كلها واجرى عليك استخبى فى حضنك

عارف يعنى ايه احساس الخنقه والزززهق والملل ، احساس بووجع جامد فى قلبى ومش قادره اقوله لحــد ،
ولازم أفضل ثابته وقادره اضحك وده بيوجع اكتر
لما اكون مخنوقه وعلى آخرى من كل حاجه واضطر اضحك واقول انا كويسه
ولما صاحبتى الرخمه تيجى تقولى نكته بارده اترمى عالارض مالضحك :(
ولما اخويا ييجى يكلمنى ارد عليه عشان ما يزعلش

ولما اقول يا خروج وبعد ما ألبس ،، تجيلى موجة اكتئاب وأقلع واحلف بحياة دبدوبى انى مش هخرج !!

حتى لما آجى أفضفض لنفسى باللى جوايا اتخنق ، وصووووت فى دماغى يصدعنى بيك ويقولى اصبرى بكره هييجى اللى يعوضك

وانت شكلك كده وقعت فى حفره مفتوحه ،، او عملت حادثه بتوكتوك

انت فيــن تنتشلنى من الحاله الإكتئابيه دى / انا شويه وهلف عليك بميكرووووفوون

اهئ اهئ اهئ اهئ :(( ايموووشن مفطور مالعياااط

ومشاعر الكراهيه اللى ساعات برميها عليـــك :) ايوووه ايووووه انا بعترف انى ساعات بكرهك
واقعد اقول زمانه رايق ولا على باله ،، وبيخرج كل يوم مع اصحابه
وسُكر وعربده ويمكن مقضيها كمان كل يوم دريم لاند ومراجيح


وانا هنااااا ولا لاقيه زحليقه يتيمه حتـــى ،، ايوه يا عم تلاقيك ولا على بالك حتى
نصك المُكتئب والمنكوب دلوقت عامل ايه
وأكيد بتآكل ومأنتخ .. او ممكن تكون من حزب الفيس بوك وأدمن فى كام صفحه وكومنتات ولايكات ولا على بالك
البلوك المشاعيرى اللى انا فيــه


وفى عز الحر البرق الرعد اللى احنا فيه ده أكيد انت بتصيف واحتمال تكون بتعاكس بنات !!!
فـى الحاله دى هفتكر كلمه بابا الشهيره
"اللى مش هيسمع الكلام هعلقه فى المروحه"
:@  ما عنديش جوووزى يعاكس دى ولا يبص على بنات يا شاطررر
واللى اوله شرط آخره بنجور ان شاء الله


اهئ اهئ غلبتنى :( ونفسى ارتاح بقى والاقيك يا نصى الضايع من سنين
عايزه لما أمر بحالات الخنقه دى الاقى حد اتصل عليه واطلع خنقتى فيــه واقعد ازعلقه
بحجة انه نسى يقفل باب التلاجه الصبح بعد ما شرب :D 
عايزه لما أكون متغاظه زى دلوقت كده ومن غير ما اكون عارفه ليه السبب
اقولك:
_ انت السبب فاااقع مرارتى ورافعلى ضغطى وهتموتنى بدرى
واول ما تسمع الكلمتين الحمضانين بتوعى تقولى:
_ لووو مش عاجبك ، هااااا .. بحبك يا شعنونه
اقوم اتغاظ اكتررررر .. واسكت 

عايــزك انت اللى تعرف انا زعلانه امتى ومخنوقه امتــى
وتعرف ايه اللى بيخلينى ارجع اضحك .. غير ان حد يزغزغنى يا حِدق
،، ومش عايزه اتقل عليــك بالطلبات الكتيرررره دى من قبل ما تيجى
لتتخض وتعملها وما تجيش 


وقتها ممكن أتغااااظ أتغااااااظ لحد ما ابقى شبه البلونه اللى عامله كدهووو
 (._.)
يرضيك أبقى شبه البلونه !!

مزيكا هاديه والكون فيها انغمر
وصيف وليل وعقد فل وسمر
ياهل ترى الناس كلهم مبسوطين
ياهل ترى شايفين جمال القمر ؟
و عجبى !!

 ســامع صوت المزيكــا !! 

يلا يا كداب بزمتك انت سامع حاجه ،، ده انا مش سامعــه

وقولى انت على حل غير انى الاقيك دلوقت

عشان زمان كنت لما اتخنق اشغل كام اغنيه حزينه لجورج مايكل

ومع ان نص الترجمه طايره منى إلا انى كنت بقعد أعيط وأزعل زياده

ولما المناديل تخلص وألاقى ان مفيش فايده أقووووم مشغله أغنيه سيلين ديون Iam alive  ودى بقى حافظاااهاااا واقعد أجعر :) احم احم قصدى أغنى 

وأطلع من مود الاكتئاب الحزين

أعمـــل انا ايـــه بقى ، ما ينفعش أسمع حاجه وما ينفعش أنزل بنفسى أدور عليـــك

ولا اعرف أزعق فى الكمبيوتر اكتر من كده لان نفسيته عيانه من امبارح وعمال بيفصل

واحتمال كبير انزل تحت الكوبرى أشحت تمن تصليحـــه

اتصرف بقى ولو سمحت تعالى بسرعه خرجنى من كل اللى بعبرتلك بيــه ده

وآه اعمل حسابك انى ممكن استناك 7 أو 6 سنين بــس

ولو ما جتش خلال المده دى أنت حرررررر 

 

 

أين فانووسى؟

رمضان السنه دى غير رمضاناتى اللى فاتت
يمكن عشان أول مره احس إنى كبرت وبقيت بدعى فى كلا صلا وأقول:
اللهم ارزقنى الزوج الصالح واجعلنى له زوجه صالحه
وبعد ما اتصدمت وعرفت ان بابا مش هيجيبلى الفانوس اللى بيغنى بتاع كل سنه :(
قعدت اعتب على حضرتك "اللى هو جوزى اللى لسه ما جاش"
ماهو انت لو كنت موجود دلوقتِ كنت هتجيبلى الفانوس
وكنت هفضل أزن على دماغك زى اى زوجه مصريه أصيله
وفى الآخر ترفع الرايه البيضا وتجيبهولى

ونقعد نتخانق قدام صاحب محل الفوانيس على الفانوس .. انت هتختار واحد بينور وبيقول وحوى يا ووحووى
وانا أصمم عالفانوس أبو شمعه
وفى الآخر صاحب المحل يختارلنا فانوس المُفتش كرومبو :)

ولما أروح معاك تبقى عايز تولع فيّا ، بس تقعد تتريق عليّا وتقولى:
فانوسك شبهك أووووى

كنت هترحمنى من حركات العيال اللى مش عارفه أبطلها
وتخلينى أتوب عن فرقعة البومب والديناميت
وتقولى:
اعقلى شويه ...
وكنت هسمع كلامك وأكتفى بالبومب والديناميت فى الشقه بس ، بره البيت لاء

يااااااه ،، كنت هتمسك ايدى ونروح عالمسجد
نصلى التراويح وأفضل ادعيلك وأنا ساجــده وأشكر ربنا انه قبل دعوتى بالزوج الصالح ، اللى هو أنت ^_^

وبعد ما نخلص الصلا نروح عالبيت وننسى نشترى السحور
وتنزل أنت تشتريه
:) عشان انت راجل البيت
عايزه أغمض عينى وأفتحها ألاقيك أنت اللى جايبلى الفانوس

كل ده بسبب بابا ، لو كان جابلى الفانوس ما كنتش فكرت فى كل ده :@
انا عايزه فانوووووس