الأربعاء، 27 يوليو، 2011

كوز البطاطا السبب يا ضنايا

طبعاَ انا اتجاهاتى السياسيه زى معظم المصريين ، سهله وبسيــــطه
أنا
مالفلول وأتبع التيار اليسارى يمين شويه امبرياليه ديكماريطيه .. واضح طبعا :D
وتبع حزب الكنبه
ودخلته من شهر ونص تقريباً
لما رجعت مالسفر ولقيت بابا شايل الصالون ومطلع كنبة بلدى بتاع تيتا
.. وانضمامى للحزب كان قوه واقتدار بعد ما رقعت بالصووووت وشديت الباقى من شعرررى وقولت:
الكنبه دى ايه اللى جابها هناااا ... وديتوااا الصالون فيـــن !!!

كان من الصعب عليّا انسى حُكم الصالون اللى لعبت عليه واتنططت لحد ما فسخت السوست ،، بس انتهت المفاوضات والمُشاحنات بعد ما بابا عزمنى على آيس كريم ووعدنى بتنفيذ مطالبى

وكانت النُخبه الصامته هما اللى ماسكين زمام الأمور فى الصاله

الست ماما طول النهار نايمه عالكنبه بحجة إن أوضتها حر والمروحه فى الصاله :(
وكالعاده رفضت واستنكرت الوضع ورفعت الأمر لمنظمة الأبهات المُتحده
وكانت النتيجه طرد ماما من الصاله
وشراء مروحه لأوضتها

وما بقيناش بنشوفها فى الصاله غير كل فين وفين
وخلصنا من الإضطهاد اليسارى ، طلعلنا بتوع الأحزاب الجديده
العيال السيس اللى موقعه بنطلوناتها وضاربه شعرها جيل :(
حاول اخويا يومين على التوالى احتلال الكنبه وضمها لممتلكاته .. بس على مين !!
فى اليوم التالت
خدت ملايتى والدبدوبين اللى حيلتى وقعدتلهم عالكنبه
طبعاً لأنها رمز سياسى بتفشخر بيــه
ولأن الجو فى اوضتى حرررر وشويه وهسيح
...

اومال ايه موضوع كوز البطاطا !!
 ده نداء عاجل لكل شباب الثوره من على كنبتى هذه .. أطالب بجعله رمزاً للثوره
أومال ايه ...

والسبب فى كده انى كنت مالمتابعين لشبكة رصد :) آهى مره وعدت وخلااااااص
وبابا لاحظ ان قعدتى عالكمبيوتر إتغيرت
بعد ما كنت بدلدل رجلى عالأرض .. بقيت أرفعها عالسرير
وكنت زمااان أشغل قرآن وأبتسم وساعات أضحك  .. اتحولت تماماً
وبقيت عماله كل شويه أقول :
_ آآآآه يا ولاااااد التيييييييييت وأزعق للشاشه الغلبانه
ده غير ان الكلمه الوحيده اللى بقيت أقولها :
أمى عملت كل حاجه

ماهى حاجه تغيـــظ . كل مسئول يقولك مش أنا ... بس كوز البطاطا كان من حظ الرئيس المخلوع :D
كنت مره قاعده لا بيا ولا عليّا بنط من صفحه لصفحه
ألاقى بوست غريب الملامح بيقووول :
أن عمو مبارك فى احدى التحقيقات كان كل شويه ينهار ويقول:
ماعملتش حااااجه .. مش أنا ،، مش أناااا   
وقتها انهارت من الضحك وافتكرت الفيلم الشهير لفاتن حمامه "الحرام"

بعد ما حملت بسبب كوز البطاطا ، طول الفيلم محمومه وبتقول:
كوووز البطاطا السبب يا ضنايّااا .. كوز البطاطا السبب يا ضنااايّاااا
وعشان دماغى ما تلسعش أكتر من كده مسحت اى صفح سياسيه من عندى وأمرت بابا بالتخلص من الكنبه وكوووووز البطاطا السبب يا ضنااااياااا
كووووز البطاطا السبب يا ضنااااااايّاااا 

 
       

هناك 3 تعليقات:

  1. مشكلة إنتي والله

    كوز البطاطا السبب يا ضنايا هههههههههههه ^^

    ردحذف
  2. انتى يا بنتى ملكيش حل اصلاا :):* بجد تحححفة وجميلة وفله وحاجه تجنن بجد :*:*

    ردحذف
  3. هههههههههه كووووز البطاطا السبب يا ضنااياااااااااا

    وتسلمولى ياااارب :*

    ردحذف