الثلاثاء، 26 يوليو 2011

ما يقع الا الشاطر

خطيبى وزوجى المُنتظر ،، ازيـــك ؟؟
عامل ايه فى الحته اللى أنا معرفهاش 
وياترى بتآكل وبتنام كويس ، ولا حاجه مضيقاك ومسهراك !!
هو أنت شغال .. ولا شغال بتدور على شغل ؟!
وبتخرج ولا بيتوتى !!
أكيد هتيجى فى يوم وأعرف عنك كل حاجه ، واسألك عن تفاصيل تفاصيــلك.
وكل ما أسألك تغيظنى وما تردش
وتطلعلى لسانك كدهووو 

نفـــسى تيجى ونخرج نتفسح :)
يــااااااه ده هيبقى يوم
طبعا هتآخدنى عالكورنيش ، صحيح احنا ما عندناش كورنيش هنا ... بس اتصرف بقى
وهنمشى وحدينا فى الشارع الطويل
وعلى انغام العصافيــر ... تيراااااراا رااااااا
تاك !!
فجأه مره واحده وانت ماشى جمبى ما ألاقيكش !!!
وأبص جمب منى ألاقى حضرتك متكعور وواقع عالأرض :D
بركاتى طالــتك .. 
وأشيلك بإيدى ومن كتر الضحك عليك ما أقدرش أمسك نفسى وسط الناس ..
وتتقمص منى ،
بس أعمل ايه كان غصب عنى
وما يقع إلا الشاطر ;) 
وانت أكيد عبقرررى مش شاطر وبــس

وبعد ما نقدر نتحرك تانى بعد موجة الضحك عليــك 
هتآخدنى على مطعم وتأكلنى جاتوه شكاليطه
علشان هكون اعترفتلك انها نقطه ضعفى الوحيده ، واعمل مكسوفه وأنا بآكل :$
وتكتشف انى بآكل زى الدصنانوووور "الديناصور يعنى"
وآجى ابصلك ألاقى وشك متلحوس
طبعا هقولك وهتقعد تمسح وشك وتسيب حته صغيره مش شايفهــا
وهنا هتيجى فرصتى :)
وأطلع منديل وأعمل نفسى بمسحهالك

شوفت الخباثه !!!

وبعد ما نخلص تقولى :
_يلا عشان أروحك ، كده اتأخرنا
وهسمع كلامك عشان بابا هيكون زمانه فى البيت رايح جاى وبيستحلف لينا
وتعدى بيا الطريق
وتتحجج وتقولى :
_هاتى ايدك أعديكى !!
وأنا وقتها هقولك:
_لا لا لا بعرف أعدى لووووحدى O.o 
وأمشى جمبك بــس !!
وانت متعرفش اللى فيهااا ، بخاف مالعربيات والطريق
بس هتطمن عشان أنت جمبى.

وبعد ما نوصل بابا يزغرلك ويقولك:
_سلملى على أبـــوك :@
وأدخل جررررى على أوضتى أبص عليك وأنت ماشى وألاقيك باصص على شوووباكى :)

يـــــــــــااااااااااااه دى هتبقى خروووجه !!
 أنا هدخل أختار هدومى اللى هلبسها معاك من دلوقت

واحشنى ياللى معرفــكش
التوقيع /
خطيبتك وزوجتك المُستقبليه ;)  

             

ليست هناك تعليقات:

إرسال تعليق