الأحد، 24 يوليو 2011

نازله الميدان يا بوووووى

بعد اللخبطه السياسيه اللى اتعرضت ليها لدرجة انى مبقتش عارفه أفرق بين البطل الطيب ، والبطل الشرير ..
جمعت أفراد أسرتى الكرام على تربيذة سفرة الإجتماعات
اللى بنستخدمها كبديل لإختراع قديم انقرض اسمه "الطبليه"
المهم

حدفت فى وشهم القرار المـــهم جداً :

_ انا هنزل أعتصم فى ميدان الشون

" والشون ده أوسع ميدان عندنا بعد الساحه اللى العيال بيلعبوا فيها كوره "

وبالطبع كانت الردود والإنعكاسات مُحفزه على الهرب إلى الميدان
الحاج بابا قالى:
ماتنسيش تآخدى بطانيه عشان البرد
والواد المسخوط اخويا رحب جداً جداً بالفكره لدرجة انه كان هيقوم يبوسنى..

اكيد بتحسدونى على أخويا حبـــيــب قلبى ..
بس أنا عارفه اللى فيها
عايز يورث اوضتى والكمبيوتر والكام دبدوب اللى حيلتى
بس ده بعينه

لما يشوف قفاه الأول :D 

وست الحبايب ربنا يحميها ليّا كان ردها المُحفز الأخير ونزلت كلمتها عليّا زى الرصاص !!
_ يا اختى اتلهى .. واهو نرتاح من دوشتك بس انجرى امسحى الشقه قبل ما تسبيها

الله عالحب .. بقى أنا نازله عشان مصر امى :)
وأمى اللى بجد وحقيقى عايزانى أمثل فيلم نحن لا نزرع الشوك ، وآخد الشقه فومين!!!

اخص ، اخص ، اخص ثم اخص

طبــعاً كان لازم ولابد أتحمس وأطالب بحقى كمواطنه حره وفرد من أفراد الأسره .. وبعبرت عن رأيي.
ورفضت فكرة مسح الشقه :)
واكتفيت بقلب الشقه وكنسها وشطف الحمام

وآآآه يا زمن .. لا بإدينا زرعنا شوووووك ...  آآآآآه

....

وروحت عالدولاب لميت خلجاتى ومحتاجاتى وملايه وبطانيه ، عشان ابقى سمعت كلام بابتى حبيبى.
وخدت كلم يافطه وقلمين

وهيلا بيلا عالميدان يا جـــدع 
مصر بتناديك

واعلنت مبادئ اعتصامى .... تتااا تاااااا

***يا عالم فهمونى ..
وحطيت يافطه جمبها وكتبت اسامى الأحزاب المصريه على قد ما افتكرت
عشان الأحزاب بقت حزب لكل مواطن :(

وفرشـــت ،، وقعــدت

وياريتنى

شويه وواحد جه وحط فى ايدى 75 قــرش O.o 
وشويتين واحده ست جات صدعتنى بأسعار الطماطم وإزاى سعر اللمون وصل 10 جنيه
..
قعدت أبص حواليّا لأكون نسيت وكتبت عاليافطه :
"مكتب السلع التموينيه _ الشكاوى والإقتراحات"
وطبيعى عشان كنت أنا المعتصمه الوحيده على أرض الشون المصريه .. اتلم الناس حواليّا !!

_ليه يا بنتى تنزلى من بيتكوا !!

_ ده انتى لسه صغيره !!!! :$

وأسفرت المفاوضات انى كنت هصـــوت وأرمى عليهم البطانيه
بس رحمهم منى مُعتصم شقيق ظهر من بعيد وبصوت قوى ناااااادى

بيوزعواااا لحمــــــــــــــه !!

كانت الكلمه كفايه ان الناس تتفرق وكلووو جرى لمصدر الصوت..
وكنت أنا أول واحده جريت طبعاً
ومن وسط كل الجموع قدرت اجيب لفة لحمه :)

وكانت مالموزه وحمرا وزى الفل ...
ولميت أدوات الإعتصام واليافطتين اللى حيلتى ويا فكيــــك عالبيت

والإستقبال كان حار طبعاً

القبلات :* والأحضان ^__^ ووحشتيــنا 

كلوووو فى سبيل اللحمه طبعا ;) 
ومع ان اعتصامى باء بالفشل الشديد ، لأنى ما لقتش حد يعرفنى إيه بيحصل !!
مين طيب ومين شرير !!
ومين بيكدب ومين اجنده !!

ده غير المُصطلحات الكتيـــر اللى أول مره أسمعها :(
وفيديو من هنا على فيديو من هناك

بس اهم حاجه الواحد استفاد بلفة اللحمه .. وبعد العشوه الدسمه
على أنغام نشرة التاسعه ..

قررت أختار يوم وانزل عالميدان

بس هآخد احتياطاتى المره دى ، عشان ما اتعرضش لأى هجوم لحمه خارجى

وعلى فكره أنا مالفلول
ولكل اللى بيقرأ دلوقتى أحب أقولكوا :

من انتـــم !!!!         

هناك 4 تعليقات:

  1. تحححححححححححححححححححفة يا بنتى ابدعتى بجد :) :*

    ردحذف
  2. :) شكراااا يا تواااااااااااااااقه :*
    رافعه معنوياااتى

    ردحذف
  3. روووووووووعة مبدعة :)
    معجب أنا >> أنا معجب O_o

    ردحذف
  4. هههههههههههههههه ربنا يخليكى يا قمر

    ده انا متفاااااءله ان الحاجات دى بتعجبكواا

    ردحذف