الأربعاء، 27 يوليو 2011

أنا مش كيميــا

خايفه ما تفهمنيــش ، أو تفهمنى بس غلط !
وساعات بخاف انك تيجى فى فتره مش مناسبه
بس بقول أكيد ربنا هيعوضنى وهيجيبك ليا فى الوقت المناسب
وما تزعلش ..
بس أنا قلقانه منك شويه
وهبقى أول أربع أيام مش عارفه اتعامل معاك بطبيعتى 
وهتلاقينى ساكته
واوعى تتعود على كده لأنى راديو :) ولما بفتح مع حد مش بسكت 
بس مش رغايّه خالــص

ومش صعبه ولا كيميا
هبقى ليك كتاب مفتوح ، وانت المفروض تبقى عارف كل اللى جوايا
مش انا مخلوقه منك ؟!!
يعنى تفهمنى علطول وما تغلبنيش معاك
مش هتبقى أنت كمان عليا
وأنا مش فاضيه أفهمك أنا ايه..


المفروض تبقى عارفنى وقافش كل مصايبى 
وكمان تحب ضحكتى .. وتقولى دى أحلى ضحكه سمعتها
وأقولك أنت بكاش على فكره
ألاقيك بتضحك بخباااااثه ;) 
بس أنا اصلا عارفه ان ضحكتى زى ضحكة العيال الصغيره ^__^


نفسى انت بس اللى تحس بيا
ولما أكون زعلانه ألاقى رساله منك
بتقولى فيها : أنتى كويسه !!!
وأرد عليك بإيموشن بيعبط وأقولك : آه بس واااحشنى أوووووى :((


عايزاك تفهم ان حاجات صغيره اوى ممكن تفرحنى،
لو جبتلى مصاصا احتمال أقوم اتنطط وأبوسك من خدك
ولما نخرج مش لازم تودينى مطعم كبـيــر وتدفع كل اللى حيلتك
وممكن
فلوسك ما تكفيش ونغسل صحون أنا وأنت :/
كفايه تجيبلى غزل البنات
بس بشرط
تشتريلى بالونه كبيره .. ماللى بتشخشخ وفيها رز


وخايفه ما تفهمش ده كله
ولما تلاقينى طفله كبيره .. ما تحبنيش :(
مرعووووبه لتفتكر إنى سهله
عشان المفروض أعذبك وأخليك تدفع دم قلبك فى خروجات وفُسح
ودباديب وهدوم ،،
بس أنا سهله كده لأنى هراعى ربنا فيــك


ومش هكون محتاجه غير انى أصلى ركعتين وأشكر ربنا عليك
وأول ما نكتب كتابنا أعيط مالفرحه..
وانت اللى تمسحلى دموعى


بس عارف لو عينك زاااغت !! ولا فكرت تبص على حد
هجتلك وأجطعك وارمى كل حته منك فى بير
أصلى فى الشر شرانيه :D 


عارف :) خايفه تكون عايزنى قمحاويه ، او عينى ملونه
صحيح أنا شقرا بس عينى مش ملونه
ومش بفكر أسمر نفسى .. بس أنت لو زنيت عليا هسمع كلامك
وأطلع يومين عالسطوح
بعدها انت ممكن ما تعرفنيش .. هبقى شكوووولاطه


ها بقى يا محيرنى ، ناوى تبقى فاهمنى
ولا أرمى نفسى من عالسرير ..
وأنتحر !!!


ليست هناك تعليقات:

إرسال تعليق