الأربعاء، 27 يوليو 2011

انتى يابت

أنا ابن آدم اللى مكتوبلك زوج .. ومستنيكى وبفكر فيكى
بس مش أوى يعنى :)
بس انا حبى ليكى مُختلف
ما أقدرش أترجمه على ورق .. ولا فى يوم أقوله ليكى كده
طبعى خشن مش زيك
وما ينفعش أكون طول الوقت رومانسى وما اعرفش أكون توم كروز
 

صحيح ما أملكش عربيه ولا حساب فى البنك
بس أنا حالف بالله أسعدك...
وأكون ليكى ظهر وسند ..

وأنا مش مارد هحققلك كل أحلامك ، ده أنا يدوب كام ضِلع ونَفَس
بس ما تهلكينيش بطلباتك اللى ساعات هبصلها انها تافهه أو مالهاش لزوم ..
وما تزهقينيش وكل شويه تقولى انتَ مش بتحبنى !!

طب إزاى مش هبحك وانتِ قدرى
!!

وهصبر ليه عليكى
أنا بس حبى ليكى مُختلف

ومش طول الوقت هسرح فيكى
ممكن وانا بلعب بلاى استيشن وأكون خسران أسرح وأفتكرك، وأقول فى سرى :
فقر!! من يوم ما اتجوزتها ولا عارف ألعب بديلى ولا عارف ألعب ماريو حتى :)

هحبك وممكن ما أقدرش أقولها كلام
بس جدتى قالتلى زمان : اللى يحب يعمل مش يقول

وأنتِ ليا ومنى وفيّا .. بحبك يابت

المُرسل /
ابن آدم اللى هيتجوزك ويطلع عينك 


 

هناك تعليقان (2):

  1. نوووو كومنت لاني محتارة اكتب ايه ;)

    ردحذف
  2. :) ربنا يخليكى يا سمسم
    بس هى مش عجبانى اوى

    ردحذف